( وكان ياما .. كان )-

وكان ياما .. كان


وكان ياما كان ...
وكان الجدع المعجباني ...

والأميرة بنت السلطان ..
وحلوة البنوتة ..

و .. لأ .. لأ كفاية كلام
لا جدع ولا بنوتة
وإقفلوا الحدوتة
وكفاياكوا عيش في الأوهام
جدع إيه وبنت سلطان ليه
عيّشتونا في خيال أحلام
إن الدنيا في خير وسلام
وياللا يا إبني إتغطى ونام
وإحلم ببنت السلطان الحلوة
وغني الغنوة
تلقاها طالة من الشباك
مستنياك
وتاخدها على حصانك وتطير
وتعيشوا في تبات ونبات
وتخلفوا صبيان وبنات
لأ .. ملتوتة ..
مش دي الحدوتة ..
مش دي الدنيا كفاية حرام
وإوعوا تقولوا دا كان زمان
في سالف العصر والأوان
أيام العفاريت والجان
لأ ..
دلوقتي زي زمان
نفس الغل ونفس الحقد
نفس الغيرة ..
نفس عليلة ونفس كبيرة
وكل واحد ماليان حيرة
وماعدتش فارقة
حتى لو نفسك إنكسرت
بتحط جبيرة
وإوعاكوا تقول دي تسالي
بنقولهالكم قبل النوم
هي صحيح تسالي بس بينا
كل ساعة وكل يوم
ليه ؟
ليه تملونا براءة
دي مش دنيا حب وهوى
الدنيا عايزة حداءة
عايزة نصاحة وفهلوة
وسيبكوا من الشاطر حسن
بس الأول قولوا
إشمعنى حسن
ليه مايكونش حسين
وللا بهادر
لأ .. إحكولنا حكاية الشاطر
اللي بتراب الفلوس
هبش القناطر
ومتين فدان
وجرف الأرض وإداها عماير
وعالكل يدوس
خلونا نعرف مين فينا الناصح
ومين المنحوس
مين فينا هايعيش في تبات
مين فينا هايوج يهج
ومين فيها هايبات
وفهمونا .. يطلع إيه التبات
وإزاي نعيش فيه مرتاحين
لأ والأكادة .. وإحنا مخلفين
صبيان وبنات
طب ورونا جدعكوا المعجباني
يمكن نفهم إيه التبات
ولا بلاش ..
لحسن الكلمة في زوره تنحاش

بعد ما خد بنت السلطان
الحلوة الأمورة

وراح يدوّر عالتبات مالقاش
وإتورّط في صبيان وبنات
عايش دلوقتي مع الأوباش
إنسوا ..
إنسوا كل حواديتكوا البايتة
ملهاش عازة
حواديت عصرنا أحلى بكتير
حواديت طازة
وبدال صندوق الدنيا
عندنا ملايين من الصناديق
وحكاويها بحق وحقيق
بناكل في لحم بعضنا
وبنشرب الدم على غيار الريق

وإرحمونا من الأميرة الحلوة
بنت السلطان

وجدعكوا المعجباني أبو حصان
وزمن الفرسان
وإنسوا كمان .. كان يا ما كان
لو عايزين تحكوا
إحكولنا عن الزمن الحالي
عن دي الدنيا
سيبكم من صندوقكوا البالي
صناديقنا شغالة طوالي
ثانية بثانية
حواديتها مليانة أخبار
بتعرفنا العيشة إزاي
من غير عفريت ولا مارد
ولا حتى الجان
إنتوا بتحكوا عن وهم الأوهام
عن الإنسان
وده في زماننا إنقرض
أو بقى قارض
حل محله إبليس شيطان
في توب وملامح إنسان
يا علاء الدين ويا سندباد
خليكوا عن عقولنا بعاد
فات الميعاد
ولا شئ هاينعاد
لا سعاد ولا ياسمينه
سيبونا نعيش ليالينا
حتى ولو حزينة
بس نعيشها وإحنا فاهمين
إن مافيش مصباح يا علاء الدين
ولا مارد ولاتنين
غير بس من البني آدمين
اللي للدم مصاصين
زي دراكولا
يوئد البنات ويقتل البنين
عشان عربية وفيللا
يتحوّل جودزيللا
خلاص بقى وفات اللي فات
مافيش عندنا لا تبات ولا نبات
ولا سكّر نبات
إرموا حواديتكم ويّا المخلفات
كفايانا حكايات .. كفايانا حكايات

***********************************
__________________
كأن قلوب الناس كواكب .. ضلّت في أفلاكها .. يسبح كلٍ حيث يجب أن يسبح الآخر .. ولو إهتدى كلٍ إلى مداره لما شهد الليل أنّات المحبين ..

مشكووووور

يسلموو

مشكوووووووووووووووووووووووووووووووووووووور

مشكوووووووور تسلم رووعه

مشكورة

يسلمو يا باشا

تحياااتي